Tuesday, December 7, 2010

ក្រោយ​ពី​ផ្អែម​ល្ហែម​ក្នុង​ផ្ទះ​សំណាក់ ប្តឹង​ថាចាប់រំលោភទារ​១ម៉ឺនដុល្លារ
ដោយ ៖ កោះឯករាជ្យ
ថ្ងៃ ច័ន្ទ ទី ៦ ខែ ធ្នូ ឆ្នាំ ២០១០
·         1
·         2
(រូបថត​ សុវណ្ណារ៉ា)
បុរស​​ដែលត្រូវ​ឃាត់​ខ្លួន​ឈ្មោះ​លឹម សំបូរ អាយុ​២៦​ឆ្នាំ
 
ក្រុង​ប៉ោយ​ប៉ែត ៖ បុរសម្នាក់​ត្រូវ​បាន​សមត្ថ​កិច្ច​​ប៉ូលិស​ក្រុង​ប៉ោយ​ប៉ែតឃាត់​ខ្លួន​ កាល​ពី​ថ្ងៃ​ទី៣ ធ្នូ តាម​​ពាក្យ​បណ្តឹង​របស់​ស្ត្រីម្នាក់​ដែល​ចោទប្រកាន់​​ថា បាន​ចាប់នាងរំលោភ​​​រហូត​បាន​សំរេច ។ ​មន្ត្រីប៉ូលិស​​​ព្រហ្ម​ទណ្ឌ​​ក្រុងប៉ោយ​ប៉ែត​​បាន​ឱ្យ​ដឹង​ថា ស្ត្រី​​ដែលបាន​​ប្តឹង​នេះ​មានអាយុ​១៩​ឆ្នាំ រស់នៅ​ឃុំ​អូរអំបិល ​ក្រុងសិរី​សោភ័ណ ​បាន​រៀប​រាប់​ប្រាប់សមត្ថកិច្ចថា ​រូបនាង​​ត្រូវ​បុរស​ម្នាក់​នាំឡើង​ផ្ទះ​​សំណាក់​ ហើយ​ចាប់​នាងរំលោភ​​រហូត​បានសំរេច​ទើប​​រូបនាង​កើត​ទុក្ខ​មិន​សុខ​ចិត្ត​ ​​មក​ប្តឹង​​សមត្ថកិច្ច​ឱ្យ​ជួយ​រកយុត្តិធម៌ និង​ទារ​​សង​ជំងឺ​ចិត្ត​១​ម៉ឺន​​ដុល្លារ​សហរដ្ឋ​អាមេរិក ។ រីឯ​​បុរស​​ដែលត្រូវ​ឃាត់​ខ្លួន​ឈ្មោះ​លឹម សំបូរ អាយុ​២៦​ឆ្នាំ មានស្រុក​​កំណើត​នៅភូមិហ្លួង​ ឃុំប្ញស្សី​ក្រោក ស្រុក​មង្គលបុរី បច្ចុប្បន្ន​​ស្នាក់​នៅ​ភូមិ​ក្បាលស្ពាន សង្កាត់​ប៉ោយ​ប៉ែត ​ក្រុងប៉ោយ​ប៉ែត ​​​មាន​មុខរបរ​​រត់ម៉ូតូ​ឌុប និងមានប្រពន្ធ​ធ្វើ​ការ​នៅក្នុង​កា​ស៊ី​ណូ ។
តាម​បុរស​ឈ្មោះ​លឹម ​សំបូរ បាន​ឆ្លើយ​ថា ​​ខ្លួន​គេ​និងស្ត្រីនោះ​គឺទើប​តែ​ស្គាល់គ្នា​បាន៣​ថ្ងៃ​ប៉ុណ្ណោះ ដោយ​មុនដំបូង​​ខ្លួនគេ​បានទៅ​ខេត្ត​បន្ទាយ​មានជ័យ​ហើយក៏បានជួប​ស្គាល់គ្នា​ដោយ​ចៃដន្យ​​​ក៏សុំលេខ​ទូរ​ស័ព្ទ​ទាក់​ទងគ្នារហូត​មក ។ លុះ​នៅថ្ងៃ​ទី៣ ធ្នូ ពួកគេ​បានណាត់ជួបគ្នា​​នៅ​ប៉ោយ​ប៉ែត ​ឯ​ស្ត្រី​រូប​នេះបានជិះរថ​យន្ត​​ឈ្នួល​មក​ក្រុង​ប៉ោយ​ប៉ែត​តាម​ការ​ណាត់ ហើយក៏បានជួប គ្នា​តែ​ម្តងទៅ ។ ដោយ​ស្ត្រី​រូបនេះ​ត្អូញ​ត្អែរ​​ចង់​រក​ការ​ងារ​ធ្វើ​​​ ខ្លួន​ក៏​បាន​នាំនាង ទៅដាក់ពាក្យ​នៅកា​ស៊ីណូ​ព្រីន​សេស ។ ​បន្ទាប់​មកនាំគ្នាហូប​បាយ​រួច​​ហើយក៏​ត្រូវ​រ៉ូវ​គ្នា​ឡើង​ដេក​នៅ​​ផ្ទះសំណាក់​មួយនៅ​ក្រុង​ប៉ោយ​​ប៉ែត មានយីហោ​ផ្ទះសំណាក់​ភ្នំពេជ្រ ដោយ​ជួលបន្ទប់​លេខ​២០៤ដេក​ ហើយ​បន្តិច​ក្រោយមក ក៏​ត្រូវ​សមត្ថ​កិច្ច​មកឃាត់​ខ្លួនតែ​ម្តង ។
បុរស​រូបនេះ​បាន​ឆ្លើយ​ទៀត​ថា ​ពេលសមត្ថ​កិច្ច​​ឃាត់​ខ្លួននោះ​ខ្លួនអត់​ដឹង​ថា មានកំហុស​អ្វី​​ទេ ស្រាប់​តែ​មកដល់​កន្លែង​ប៉ូលិស​ទើប​ដឹង​ថា ត្រូវ​ស្រីស្នេហ៍​​នោះប្តឹង​ថា បានចាប់នាងរំលោភ​​ និង​ទារ​​​ឱ្យ​​សង​ជំងឺ​ចិត្ត​ចំនួន១ម៉ឺន​ដុល្លារ​អាមេរិក​ថែម​​ទៀតផង ។ តាម​ពិត​ស្ត្រីរូបនោះបាន​ព្រមព្រៀង​ ស្ម័គ្រ​ចិត្តឡើង​ដេកនៅ​ផ្ទះសំណាក់​ជាមួយខ្លួន​​ ហើយបាន​រួម​រ័កចំនួន១ដង​ ក៏​ត្រូវគេប្តឹង​ទារ​លុយ​ជំងឺ​ចិត្ត​ចំនួន​១ម៉ឺន​ដុល្លារ​តែម្តង ។ ចំពោះ​បញ្ហា​​ទាំង​អស់នេះ​លោកអនុ​សេនីយ៍​ឯក​អ៊ុំ សុផល អធិការ​ប៉ូលិស​ក្រុង​ប៉ោយប៉ែត​បាន​ថ្លែង​ថា រឿងនេះ​លោកមិនអាចរក​ដំណោះ​ស្រាយ​​បានទេ គឺមាន​តែ​ស្ថាប័ន​តុលាការ​​ប៉ុណ្ណោះ​ ទើប​អាចវិនិច្ឆ័យ​​បានថា តើនរណា​ខុស​​នរណាត្រូវ​ ។ តាម​ប្រភព​មួយបាន​បង្ហើប​ឱ្យ​ដឹង​ថា បុរសជាប់​ចោទនេះ​ជាកូន​អ្នកមាន​ធូរធារ​ម្នាក់ ​នៅ​ស្រុក​មង្គលបុរី​ ហើយបានភ្លាត់ស្នៀត​​ធ្លាក់ចូលក្នុង​អន្ទាក់​​របស់គេបែបនេះ​ទៅ ៕
កោះសន្តិភាព


No comments:

Post a Comment